محسن نقوی اور امریکی سفیر نیٹلی بیکر کی ملاقات، مشرق وسطیٰ کی صورتحال پر تبادلہ خیال

وفاقی وزیر داخلہ محسن نقوی سے امریکی سفیر نیٹلی بیکر نے اہم ملاقات کی، جس میں مشرق وسطیٰ کی موجودہ صورتحال اور اسلام آباد میں جاری اعلیٰ سطح کے مذاکرات پر تفصیلی بات چیت کی گئی۔

ملاقات کے دوران دونوں رہنماؤں نے خطے میں امن و استحکام کی اہمیت پر زور دیا اور اس حوالے سے پاکستان کے کردار پر بھی تبادلہ خیال کیا۔ امریکی سفیر نے مشرق وسطیٰ کے پیچیدہ حالات میں پاکستان کے مثبت اور تعمیری سفارتی کردار کو سراہتے ہوئے کہا کہ پاکستان نے ہمیشہ خطے میں امن کے فروغ کے لیے ذمہ دارانہ اقدامات کیے ہیں۔

محسن نقوی نے اس موقع پر پاکستان کے مؤقف کو واضح کرتے ہوئے کہا کہ ملک خطے میں کشیدگی کم کرنے اور مذاکرات کے ذریعے مسائل کے حل کا حامی ہے۔ انہوں نے کہا کہ پاکستان امن، استحکام اور باہمی تعاون کے فروغ کے لیے اپنی کوششیں جاری رکھے گا۔

ملاقات میں دوطرفہ تعلقات، سیکیورٹی تعاون اور خطے کی مجموعی صورتحال پر بھی تبادلہ خیال کیا گیا۔ دونوں فریقین نے اس عزم کا اظہار کیا کہ پاکستان اور امریکہ کے درمیان تعلقات کو مزید مضبوط بنانے اور مشترکہ اہداف کے حصول کے لیے تعاون جاری رکھا جائے گا۔