خیبر پختونخوا ریونیو اتھارٹی کا کنزیومر ریوارڈز اسکیم کے تحت پہلا لکی ڈرا منعقد

لکی ڈرا میں مجموعی طور پر 50 خوش نصیب افراد کا انتخاب کیا گیا، جن میں سے ہر ایک کو 10 ہزار روپے کا انعام دیا گیا۔

تفصیلات کے مطابق، کنزیومر ریوارڈز اسکیم کا آغاز KPRA نے رواں سال فروری میں خیبر پختونخوا کے چار اضلاع میں کیا تھا، جس کا مقصد ہوٹلنگ اور ریسٹورنٹ سیکٹر میں شفافیت اور ٹیکس کلچر کو فروغ دینا ہے۔

اسکیم کے آغاز سے قبل KPRA ٹیموں نے منتخب ہوٹلوں اور ریسٹورنٹس میں اسٹینڈیز نصب کیں تاکہ صارفین کو آگاہی فراہم کی جا سکے کہ وہ خدمات حاصل کرنے کے بعد موصول ہونے والی رسیدیں جمع کرا کے اس اسکیم میں حصہ لے سکتے ہیں۔

15 فروری سے 15 مارچ 2026 کے درمیان مجموعی طور پر 176 رسیدیں موصول ہوئیں، جنہیں لکی ڈرا میں شامل کیا گیا۔ ڈرا ڈیجیٹل انداز میں شفاف طریقے سے ڈائریکٹر جنرل KPRA، مس ارم ناز نے سینئر افسران کی موجودگی میں منعقد کیا۔

اس موقع پر خطاب کرتے ہوئے ڈائریکٹر جنرل مس ارم ناز نے کامیاب ہونے والوں کو مبارکباد دی اور کہا کہ یہ اسکیم مزید تین ماہ تک جاری رہے گی، جس دوران مزید تین لکی ڈراز منعقد کیے جائیں گے۔

انہوں نے مزید کہا کہ موجودہ مرحلے کی کامیابی کے بعد اس اسکیم کو پورے صوبے تک وسعت دی جائے گی۔

انہوں نے عوام سے اپیل کی کہ وہ اس اقدام میں بڑھ چڑھ کر حصہ لیں تاکہ انعام جیتنے کا موقع حاصل کر سکیں۔

شفافیت کو یقینی بنانے کے لیے KPRA کے افسران، عملے اور ان کے اہل خانہ کو اس اسکیم میں شرکت کی اجازت نہیں دی گئی۔

ڈائریکٹر جنرل نے شرکاء کا شکریہ بھی ادا کیا جنہوں نے اپنی رسیدیں جمع کروا کر اس اسکیم کو کامیاب بنایا۔

واضح رہے کہ پشاور، مردان، ایبٹ آباد اور ہری پور میں منتخب ہوٹلوں اور ریسٹورنٹس سے خدمات حاصل کرنے والے صارفین اسٹینڈیز پر موجود QR کوڈ اسکین کر کے اپنی رسیدوں کی تصاویر شیئر کر کے اس اسکیم میں حصہ لے سکتے ہیں۔