النور جیم خانہ کی ماسٹر آئل انٹر کلب کرکٹ ٹورنامنٹ کے سیمی فائنل میں رسائی

ریجنل کرکٹ ایسوسی ایشن کراچی کے زیرِ اہتمام اور ماسٹر آئل لبریکینٹس کے تعاون سے جاری ماسٹر آئل انٹر کلب کرکٹ ٹورنامنٹ کے آخری کوارٹر فائنل میں النور جیم خانہ نے فیصل جیم خانہ کو 8 وکٹوں سے شکست دے کر سیمی فائنل میں جگہ بنا لی۔

کے سی سی اے اسٹیڈیم میں کھیلے گئے اس اہم مقابلے میں فیصل جیم خانہ نے پہلے بیٹنگ کرتے ہوئے مقررہ اوورز میں 217 رنز بنائے۔ محمد افضل نے شاندار بیٹنگ کا مظاہرہ کرتے ہوئے 12 چوکوں اور 4 چھکوں کی مدد سے 100 رنز کی دلکش اننگز کھیلی۔ ارسلان فرزند نے 2 چوکوں اور 3 چھکوں کے ساتھ ناقابلِ شکست 41 رنز اسکور کیے جبکہ عون عباس نے 37 رنز کا اضافہ کیا۔

النور جیم خانہ کی جانب سے سلو لیفٹ آرم لیگ اسپنر فرحان انور نے 49 رنز دے کر 3 وکٹیں حاصل کیں، جبکہ ٹیسٹ کرکٹر فواد عالم نے عمدہ بولنگ کرتے ہوئے 24 رنز کے عوض 2 کھلاڑیوں کو پویلین کی راہ دکھائی۔

ہدف کے تعاقب میں النور جیم خانہ کے بیٹرز نے پراعتماد کھیل پیش کیا اور صرف 27 اوورز میں 2 وکٹوں کے نقصان پر مطلوبہ 220 رنز بنا لیے۔ محمد عمار نے 9 چوکوں اور 2 چھکوں کی مدد سے 84 رنز کی جاندار اننگز کھیلی۔ فضل سبحان نے 4 چوکوں کے ساتھ 60 رنز بنائے جبکہ ٹیسٹ کرکٹر فواد عالم نے ایک بار پھر آل راؤنڈ کارکردگی دکھاتے ہوئے 4 چوکوں اور 3 چھکوں کی مدد سے ناقابلِ شکست 52 رنز اسکور کیے۔

اس کامیابی کے ساتھ النور جیم خانہ نے ٹورنامنٹ کے سیمی فائنل میں رسائی حاصل کر لی ہے جہاں اس کا مقابلہ ایونٹ کی ایک مضبوط ٹیم سے ہوگا۔