جدت کے ذریعے کسانوں کو با اختیار بنانے کے موضوع پر ایک روزہ کانفرنس کا انعقاد

پاکستان کے زرعی منظرنامے کو تبدیل کرنے کی ایک بھرپور کوشش کے طور پر، فارمرز ڈیولپمنٹ آرگنائزیشن نے، چیمبر آف ایگریکلچر اوکاڑہ، اور زرعی یونیورسٹی فیصل آباد کے اشتراک سے "زرعی پیداوار میں ویلیو ایڈیشن کو مضبوط بنانا” کے موضوع پر ایک روزہ کانفرنس کا انعقاد کیا۔
کانفرنس میں 200 سے زائد شرکاء نے شرکت کی، جن میں پالیسی ساز، زرعی ماہرین، تعلیمی ماہرین، کسان، زرعی کاروباری افراد، اور ڈیجیٹل انفلوئنسرز شامل تھے۔ اس کانفرنس کا مقصد کسانوں کی آمدنی بڑھانے کے لیے ویلیو ایڈیشن کی جدید حکمت عملیوں کا جائزہ لینا تھا۔
کیئر پاکستان کے کنٹری ڈائریکٹر، عادل شیراز نے اپنے کلیدی خطاب میں کہا کہ:
"میرا یقین ہے کہ چھوٹے کسانوں کو جدت کے ذریعے ویلیو ایڈیشن کے قابل بنانا ایک پائیدار مستقبل کی کنجی ہے۔ ہم جدید تکنیکوں اور شراکت داریوں میں سرمایہ کاری کر رہے ہیں تاکہ اپنے زرعی نظام کو مستحکم کر سکیں، خاص طور پر خواتین کی حمایت کے ذریعے۔ جب ہمارے کسان کامیاب ہوں گے، پاکستان کامیاب ہوگا۔”سلمی ا بٹ ایڈوائزر ٹو سی ایم پنجاب مریم نواز نے اس موقع پر ایف ڈی او، کیئر پاکستان ،چیمبر اینڈ فوڈ ایگری کلچر کے اقدامات کو سراہتے ہوئے اس بات کا اعادہ کیا کہ پنجاب حکومت کسانوں کی ترقی کے لیے اقدامات یقینی رہی ہے ۔ اس کانفرنس کی افادیت اس حوالے سے بھی اہمیت کی حامل ہے کہ کانفرنس کے بعد جاری اعلامیہ کو حکومتی پالیسیوں میں شامل کر کے خصوصا چھوٹے کسانوں کے لیے ویلیو ایڈیشن کے پروگرام شروع کیے جاسکتے ہیں ۔ انہوں نے اس موقع پر شی فیڈز دی ورلڈ پراجیکٹ کی وومن انٹرپرینیورر خواتین کے ہاتھوں سے بنی پراڈکٹ کے سٹالز کادورہ کیا اور خوش آئند اقدام کو سراہا ۔ ایف ڈی او کے چیف ایگزیکٹو، غلام مصطفیٰ نے دیہی روزگار کو بہتر بنانے کے لیے تنظیم کے عزم کا اعادہ کیا اور اس بات پر زور دیا کہ زرعی پیداوار میں ویلیو ایڈیشن کے لیے نہ صرف ان پیداوار کو محفوظ کیا جا سکتا ہے بلکہ ان کی مارکیٹنگ کر کے ہمارا کسان خوشحالی کی طرف قدم رکھ سکتا ہے ۔ چیمبر آف فوڈ اینڈ ایگریکلچر کے مرکزی صدر، شوکت علی چدھڑ نے کانفرنس کے مقاصد بیان کیے اور زرعی شعبے کو منافع بخش اور پائیدار بنانے کے لیے تمام اسٹیک ہولڈرز کے درمیان تعاون کی اہمیت پر زور دیا۔زرعی یونیورسٹی فیصل آباد کے الحاقی کالج دیپالپور کے پرنسپل، ڈاکٹر طاہر منیر بٹ نے "ویلیو ایڈیشن کیا ہے اور یہ کسانوں کی آمدنی کیسے بڑھا سکتی ہے؟” کے عنوان سے ایک تکنیکی سیشن پیش کیا۔ انہوں نے پوسٹ ہارویسٹ ٹیکنالوجی، ایگرو پروسیسنگ، اور مارکیٹ سے روابط کو بہتر بنا کر چھوٹے پیمانے کے کسانوں کے لیے منافع بڑھانے کے عملی طریقے پیش کیے۔کانفرنس کی ایک خاص بات ایک پینل ڈسکشن تھی، جس میں RAEDC، SMEDA، پنجاب ایکسپورٹ بورڈ، بزنس ڈیولپمنٹ ڈیپارٹمنٹ، محکمہ زراعت، سول سوسائٹی، کسان تنظیموں، تعلیمی اداروں، اور یوٹیوب انفلوئنسرز کے نمائندوں نے شرکت کی۔ اس میں مارکیٹ تک رسائی، زرعی کاروباری مواقع، اور زرعی مصنوعات کو فروغ دینے کے لیے ڈیجیٹل پلیٹ فارمز کے استعمال جیسے اہم موضوعات پر بات چیت کی گئی۔