پاکستان نے سعودی عرب کے دارالحکومت ریاض میں منعقدہ ورلڈ ڈیفنس شو 2026 میں اپنی دفاعی ٹیکنالوجی کی ایک اور شاندار کامیابی پیش کرتے ہوئے جدید ہائپرسونک بیلسٹک میزائل SMASH (Supersonic Missile Anti-Ship) متعارف کرا دیا ہے۔ یہ میزائل پاکستان کی مقامی دفاعی صنعت بالخصوص گلوبل انڈسٹریل اینڈ ڈیفنس سلوشنز (GIDS) کی تیار کردہ جدید ترین پروڈکٹ ہے، جو ملک کی خود انحصاری اور اسٹریٹجک صلاحیت میں نمایاں اضافہ تصور کی جا رہی ہے۔
SMASH بنیادی طور پر ایک اینٹی شپ بیلسٹک میزائل سسٹم ہے جو سمندر میں موجود جنگی بحری جہازوں کے ساتھ ساتھ زمینی اہداف کو بھی انتہائی درستگی سے نشانہ بنانے کی صلاحیت رکھتا ہے۔ دفاعی ماہرین کے مطابق اس کی مؤثر رینج تقریباً 350 کلومیٹر ہے جبکہ اس میں جدید رہنمائی نظام، ہدف کی خودکار شناخت اور الیکٹرانک مزاحمت سے بچنے کی خصوصیات شامل کی گئی ہیں۔ میزائل کی ہائپرسونک رفتار اور ہدف کے قریب پہنچ کر عمودی زاویے سے حملہ کرنے کی ٹیکنالوجی اسے روایتی فضائی و میزائل دفاعی نظاموں کے لیے انتہائی مشکل چیلنج بنا دیتی ہے۔
پاکستان نیوی کی جانب سے اس سسٹم کے متعدد عملی تجربات بھی کیے جا چکے ہیں جن میں جنگی بحری جہاز سے فائرنگ کر کے متحرک اہداف کو کامیابی سے نشانہ بنایا گیا۔ ماہرین کا کہنا ہے کہ یہ میزائل بحرِ ہند میں طاقت کے توازن کو مزید مستحکم کرے گا اور پاکستان کی بحری حدود کے دفاع کو ناقابلِ تسخیر بنانے میں اہم کردار ادا کرے گا۔ ورلڈ ڈیفنس شو میں مختلف ممالک کے وفود نے پاکستانی پویلین میں خصوصی دلچسپی ظاہر کی اور اسے خطے میں دفاعی صنعت کی بڑی پیش رفت قرار دیا۔
حکومتی و عسکری حلقوں کے مطابق SMASH میزائل کی تیاری اس بات کا ثبوت ہے کہ پاکستان جدید ٹیکنالوجی کے میدان میں تیزی سے آگے بڑھ رہا ہے اور اپنی دفاعی ضروریات مقامی سطح پر پورا کرنے کی مکمل صلاحیت حاصل کر رہا ہے۔ یہ منصوبہ نہ صرف عسکری بلکہ معاشی لحاظ سے بھی اہم ہے کیونکہ اس سے برآمدات اور بین الاقوامی شراکت داری کے نئے مواقع پیدا ہوں گے۔
