وفاقی وزراء اور اتحادی جماعتیں سندھ حکومت کے خلاف سازشوں میں ملوث، شرجیل میمن کا الزام

سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے وفاقی حکومت کی اتحادی جماعتوں اور ایم کیو ایم پر شدید تنقید کی ہے اور انہیں سندھ حکومت کے خلاف سازشوں میں ملوث قرار دیا ہے۔

شرجیل میمن نے اپنے بیان میں کہا کہ وفاقی وزراء کی نفرت انگیز تقاریر اور اتحادی جماعتوں کی روزانہ کی بنیاد پر کی جانے والی مہمات سندھ حکومت کے خلاف ایک سوچی سمجھی حکمت عملی کا حصہ ہیں۔ انہوں نے کہا کہ ایک طرف وفاقی حکومت ہر معاملے میں پاکستان پیپلز پارٹی (پی پی پی) سے تعاون طلب کرتی ہے، لیکن دوسری جانب اسی حکومت کے اتحادی اور وفاقی وزراء سندھ اور اس کی منتخب حکومت کے خلاف مسلسل سازشوں میں مصروف ہیں۔

انہوں نے زور دے کر کہا کہ یہ رویہ صوبہ سندھ کی عوام کے مفاد کے خلاف ہے اور وفاقی حکومت کی دیانتداری اور شفافیت پر سوالیہ نشان ہے۔ شرجیل میمن نے پی پی پی قیادت سے مطالبہ کیا کہ وہ وفاقی حکومت سے اس معاملے پر فوری اور سنجیدہ وضاحت طلب کرے تاکہ اس طرح کی نفرت انگیز سرگرمیوں اور سازشوں کو روکا جا سکے۔

صوبائی وزیر نے کہا کہ سندھ حکومت عوامی فلاح و بہبود کے کاموں میں مصروف ہے، جبکہ وفاقی وزراء اور اتحادی جماعتیں میڈیا کے ذریعے غلط پروپیگنڈا کر کے عوام کے ذہنوں میں شک پیدا کر رہی ہیں۔ انہوں نے یہ بھی انتباہ کیا کہ سندھ حکومت اپنی پالیسیوں اور منصوبوں کو عوام کے مفاد میں جاری رکھے گی اور کسی بھی سازش کو کامیاب نہیں ہونے دے گی۔

شرجیل میمن کا یہ بیان ایسے وقت میں آیا ہے جب ملک میں سیاسی کشیدگی بڑھ رہی ہے اور وفاقی و صوبائی حکومتوں کے تعلقات مزید تناؤ کا شکار ہیں۔ انہوں نے عوام کو یقین دلایا کہ پی پی پی کی قیادت ہمیشہ صوبے اور عوام کے مفاد کو مقدم رکھے گی اور سیاسی مخالفت کے باوجود ترقیاتی منصوبے جاری رہیں گے۔

رپورٹ: عبدالمومن