ایبٹ آباد: سکیورٹی خدشات کے پیش نظر کینٹ سرکل میں ہوٹلوں اور سراؤں کی جامع چیکنگ
ڈی پی او ایبٹ آباد کی ہدایات پر پولیس کی مؤثر کارروائی، ہوٹل ریکارڈ اور سکیورٹی انتظامات کا تفصیلی جائزہ
ضلعی پولیس افسر ایبٹ آباد ہارون رشید خان کی خصوصی ہدایات پر موجودہ سکیورٹی صورتحال کے پیش نظر کینٹ سرکل کی حدود میں قائم مختلف ہوٹلوں اور سراؤں کی جامع چیکنگ عمل میں لائی گئی۔ کارروائی ایس پی کینٹ علی حمزہ بٹ کی زیر نگرانی کی گئی، جبکہ ڈی ایس پی کینٹ اور ایس ایچ او کینٹ نے پولیس نفری کے ہمراہ چیکنگ آپریشن کی قیادت کی۔
پولیس کی جانب سے کی جانے والی اس کارروائی کے دوران ہوٹلوں اور سراؤں میں مہمانوں کے اندراج کا ریکارڈ، شناختی دستاویزات، سکیورٹی کیمروں، داخلی و خارجی راستوں اور مجموعی سکیورٹی انتظامات کا تفصیلی جائزہ لیا گیا۔ پولیس افسران نے ہوٹل انتظامیہ کو ہدایت کی کہ وہ تمام مہمانوں کا مکمل اور درست اندراج رکھیں اور بغیر شناختی دستاویزات کے کسی بھی فرد کو قیام کی اجازت نہ دیں۔
چیکنگ کے دوران متعلقہ انتظامیہ کو واضح ہدایات جاری کی گئیں کہ کسی بھی مشکوک سرگرمی یا فرد کی موجودگی کی صورت میں فوری طور پر قریبی پولیس اسٹیشن کو اطلاع دی جائے۔ پولیس نے اس امر پر زور دیا کہ قانون کے مطابق سکیورٹی انتظامات کو مزید مؤثر بنایا جائے تاکہ کسی بھی ناخوشگوار واقعے سے بروقت نمٹا جا سکے۔
اس موقع پر پولیس افسران نے کہا کہ شہریوں اور مسافروں کی جان و مال کا تحفظ پولیس کی اولین ذمہ داری ہے۔ انہوں نے بتایا کہ ہوٹلوں اور سراؤں کی باقاعدہ چیکنگ کا مقصد شہر میں امن و امان کی صورتحال کو برقرار رکھنا اور جرائم پیشہ عناصر کی نقل و حرکت پر کڑی نظر رکھنا ہے۔
پولیس حکام کے مطابق اس طرح کے چیکنگ آپریشنز مستقبل میں بھی جاری رہیں گے تاکہ ایبٹ آباد میں قیام پذیر شہریوں، سیاحوں اور مسافروں کو محفوظ ماحول فراہم کیا جا سکے۔ پولیس نے عوام سے بھی اپیل کی کہ وہ قانون نافذ کرنے والے اداروں کے ساتھ مکمل تعاون کریں اور کسی بھی مشکوک سرگرمی کی اطلاع فوری طور پر پولیس کو دیں۔
ضلعی پولیس انتظامیہ نے اس عزم کا اظہار کیا کہ امن و امان کے قیام کے لیے تمام دستیاب وسائل بروئے کار لائے جائیں گے اور کسی کو بھی قانون ہاتھ میں لینے کی اجازت نہیں دی جائے گی۔
