مظہر حسین، مصنف و محقق کی چوتھی کتاب شائع ہو گئی

اسلام آباد(نمائندہ نوائے ہزارہ ) بھارت میں اقلیتوں، خصوصا مسلمانوں کی سماجی، سیاسی اور معاشی حیثیت پر مبنی تحقیقی مضامین کا مجموعہ "Others in India” منظرِ عام پر آگیا ہے۔ یہ کتاب معروف محقق اور مصنف مظہر حسین کی تازہ ترین تصنیف ہے، جس میں انہوں نے بھارت میں ہندوتوا کے عروج کے بعد مسلمانوں کو درپیش بڑھتی ہوئی علیحدگی اور امتیازی سلوک کا علمی و تجزیاتی جائزہ پیش کیا ہے۔کتاب میں مصنف نے یہ واضح کرنے کی کوشش کی ہے کہ کس طرح ہندوتوا کے انتہا پسندانہ نظریات نے بھارتی سماج میں غیر ہندو برادریوں کے لیے فضا کو تنگ کر دیا ہے۔ مظہر حسین کے مطابق، برہمن مت کی تاریخی روایت , جس کے تحت اختلاف رکھنے والی یا غیر مطابقت پذیر برادریوں کو سماجی، سیاسی اور معاشی طور پر تنہا کیا جاتا رہا ہے , اب مسلمانوں کے خلاف ایک منظم شکل اختیار کر چکی ہے۔ آج بھارت میں مسلمان بھی دلتوں کی طرح مخصوص بستیوں (گھیٹوز) میں رہنے پر مجبور ہیں، جہاں انہیں تعلیم، روزگار اور شہری سہولتوں سے محروم رکھا جا رہا ہے۔”Others in India” دراصل ایک سنجیدہ تحقیقی کاوش ہے جو اس خطے میں مذہبی رواداری، اقلیتوں کے حقوق اور انسانی مساوات کے موضوع پر گہری بصیرت فراہم کرتی ہے۔اس سے قبل مظہر حسین کی تصانیف "Hindutva Explained” "Back to Gujarat” اور "India: A Nightmare for Muslim Women” بھی شائع ہو چکی ہیں، جنہیں علمی و صحافتی حلقوں میں بھرپور پذیرائی ملی۔ ان کتابوں میں مصنف نے بھارت میں ہندوتوا کے ظہور اور اس کے سماجی و سیاسی اثرات کا عمیق تجزیہ پیش کیا ہے۔ "Others in India”ان تمام قارئین کے لیے ایک اہم حوالہ ہے جو جنوبی ایشیا میں اقلیتوں کی صورتِ حال، مذہبی انتہا پسندی اور معاشرتی انصاف کے موضوعات سے دلچسپی رکھتے ہیں۔