💰 بی آئی ایس پی کے تحت رمضان پر مستحق خواتین کیلئے خوشخبری: سہ ماہی قسط میں 1,000 روپے اضافہ

بینظیر انکم سپورٹ پروگرام (BISP) نے رمضان المبارک کے آغاز پر مستحق خواتین کے لیے بڑی خوشخبری سناتے ہوئے سہ ماہی قسط میں ایک ہزار روپے کا اضافہ کر دیا ہے۔ اس اضافے کے بعد اب خواتین کی سہ ماہی قسط ساڑھے 14 ہزار روپے تک پہنچ گئی ہے، جو پہلے ساڑھے 13 ہزار روپے تھی۔

اس کے علاوہ بینظیر تعلیمی وظائف اور بینظیر نشوونما پروگرام کے وظائف میں بھی 500 روپے کا اضافہ کیا گیا ہے، تاکہ تعلیم اور نشوونما کے شعبوں میں بھی مالی مدد میں بہتری آئے۔

بی آئی ایس پی ہیڈکوارٹرز اسلام آباد میں سینیٹر روبینہ خالد کی زیر صدارت براہِ راست ای کچہری کا انعقاد بھی کیا گیا، جہاں مستحق خواتین کی سہولت اور ان کے مسائل سننے اور حل کرنے پر زور دیا گیا۔

چیئرپرسن سینیٹر روبینہ خالد نے خواتین سے اپیل کی کہ جو لوگ ڈیجیٹل والٹ کے لیے مفت سم نہیں حاصل کر سکیں، وہ فوری طور پر بی آئی ایس پی دفاتر سے اپنی سم کے لیے رجوع کریں تاکہ امداد کی سہولت میں کوئی رکاوٹ نہ آئے۔

یہ اقدام ملک بھر میں مستحق خواتین کی مالی معاونت کو بڑھانے اور رمضان کے مبارک موقع پر ان کی ضروریات کو پورا کرنے کے لیے ایک اہم قدم ہے۔

رپورٹ: عبدالمومن