وزیرِ اعظم محمد شہباز شریف نے اریکسن کے اعلیٰ سطحی وفد سے ملاقات کے دوران پاکستان میں جدید ڈیجیٹل کنیکٹوٹی، فائیو جی ٹیکنالوجی اور آئی ٹی انفراسٹرکچر کی ترقی کے لیے قریبی تعاون پر زور دیا۔ یہ ملاقات منگل کو وزیرِ اعظم ہاؤس اسلام آباد میں منعقد ہوئی۔
وفد کی قیادت اریکسن کے صدر اور یورپ، مشرقِ وسطیٰ اور افریقہ کے لیے مارکیٹ ایریا کے سربراہ پیٹرک جوہانسن کر رہے تھے۔ وزیرِ اعظم نے وفد کا خیرمقدم کرتے ہوئے پاکستان میں اریکسن کی چھ دہائیوں پر محیط موجودگی اور ٹیلی کمیونی کیشن کے شعبے میں خدمات کو سراہا۔
وزیرِ اعظم شہباز شریف نے کہا کہ جدید ڈیجیٹل نیٹ ورکس معاشی ترقی، قومی پیداوار میں اضافے اور عوامی خدمات کی بہتر فراہمی کے لیے ناگزیر ہیں۔ انہوں نے اس عزم کا اظہار کیا کہ پاکستان محفوظ، مضبوط اور قومی ضروریات سے ہم آہنگ ڈیجیٹل انفراسٹرکچر کی ترقی کے لیے عالمی تجربات سے استفادہ کرنا چاہتا ہے۔
ملاقات میں فائیو جی نیٹ ورک، جدید مواصلاتی نظام، اور ڈیجیٹل ٹیکنالوجی کے ذریعے سرکاری اداروں کی کارکردگی بہتر بنانے پر تفصیلی تبادلہ خیال کیا گیا۔ وزیرِ اعظم نے کہا کہ پاکستان فائیو جی سمیت جدید نیٹ ورکس کے حوالے سے اریکسن کے عالمی تجربے سے سیکھنے میں گہری دلچسپی رکھتا ہے۔
گفتگو کے دوران ڈیجیٹل مہارتوں کی ترقی، مالی شمولیت، کیش لیس ادائیگی کے نظام کے فروغ اور قدرتی آفات سے نمٹنے کے لیے ٹیکنالوجی کے مؤثر استعمال پر بھی اتفاق کیا گیا۔ وزیرِ اعظم نے کہا کہ جدید ٹیکنالوجی نہ صرف معیشت کو مستحکم کرتی ہے بلکہ ادارہ جاتی مضبوطی اور ہنگامی حالات میں بہتر ردعمل کو بھی ممکن بناتی ہے۔
وزیرِ اعظم نے غیر ملکی سرمایہ کاروں اور اسٹریٹجک ٹیکنالوجی شراکت داروں کو مکمل حکومتی تعاون کی یقین دہانی کراتے ہوئے کہا کہ پاکستان سرمایہ کاری کے لیے سازگار ماحول فراہم کر رہا ہے۔
اریکسن کے وفد نے پاکستان میں آئی ٹی انفراسٹرکچر کی بہتری، فائیو جی اسپیکٹرم نیلامی اور ڈیجیٹل اصلاحات کے لیے حکومتی اقدامات کو سراہا۔
ملاقات میں نائب وزیرِ اعظم و وزیرِ خارجہ محمد اسحاق ڈار، وزیرِ مملکت برائے آئی ٹی شزا فاطمہ خواجہ، وزیرِ اعظم کے معاونِ خصوصی سید طارق فاطمی اور دیگر اعلیٰ حکام نے بھی شرکت کی۔
