عید الفطر پر اضافی کرایہ وصول کرنے والوں کے خلاف کارروائی کا حکم دے دیا ہے رجیل انعام میمن

سندھ کے سینئر وزیر شرجیل انعام میمن نے عید الفطر پر اضافی کرایہ وصول کرنے والوں کے خلاف کارروائی کا حکم دے دیا ہے۔ سندھ حکومت نے عوام کو ریلیف دینے کا فیصلہ کرتے ہوئے ٹرانسپورٹ حکام کو کرایہ کنٹرول کرنے کے احکامات جاری کر دیئے ہیں اور عید الفطر کے موقع پر زائد کرایہ وصول کرنے والے ٹرانسپورٹرز کے خلاف کریک ڈاؤن کیا جارہا ہے، اس سلسلے میں ڈی آئی جی ٹریفک اور کمشنرز کو غیر قانونی کرایہ بڑھانے والوں کے خلاف فوری ایکشن کی ہدایات جاری کردی گئی ہیں۔
سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ عید الفطر کے موقع پر عوام کو اضافی مالی بوجھ سے بچانے کے لیے سندھ حکومت ہر ممکن اقدامات کر رہی ہے، زائد کرایہ وصول کرنے والوں کے خلاف سخت کارروائی ہوگی، اور کسی کو عوام کا استحصال کرنے کی اجازت نہیں دی جائے گی۔
انہوں نے کہا کہ ٹرانسپورٹروں کی من مانی بند، اضافی کرایہ لینے والوں پر جرمانے اور قانونی کارروائی ہوگی ، ٹرانسپورٹ مالکان کو متعین کردہ کرایوں پر عملدرآمد یقینی بنانا ہوگا، بصورت دیگر ان کے خلاف قانونی کارروائی کی جائے گی۔
سینئر وزیر شرجیل انعام میمن نے کہا کہ اگر کسی ٹرانسپورٹر کی جانب سے زائد کرایہ وصول کیا جا رہا ہو تو عوام فوری طور پر شکایت درج کرائیں۔
محکمہ ٹرانسپورٹ کی جانب سے سندھ بھر میں بس اڈوں اور ٹرمینلز پر چیکنگ، زائد کرایہ لینے والوں کے خلاف روزانہ کی بنیاد پر کارروائی کی احکامات جاری کر دیئے گئے ہیں، محکمہ ٹرانسپورٹ کا کہنا ہے کہ زائد کرایہ وصولی کی شکایات واٹس ایپ 0300-3495375 پر درج کرائیں، عوام زائد کرایوں کی شکایات secretarytransportsindh@gmail.com پر بھیج سکتے ہیں ۔