کراچی میں شرجیل میمن کی پریس کانفرنس، حکومتی کارکردگی اور عالمی سفارتکاری پر گفتگو

کراچی میں 13 اپریل 2026 کو منعقدہ ایک اہم پریس کانفرنس سے خطاب کرتے ہوئے شرجیل انعام میمن نے کہا ک اسلام آباد میں منعقد ہونے والے ایک بڑے بین الاقوامی ایونٹ نے پاکستان اور اس کے گرین پاسپورٹ کی عالمی اہمیت کو اجاگر کیا ہے۔ انہوں نے اس کامیابی پر آصف علی زرداری، وزیر اعظم اور عسکری قیادت کو مبارکباد پیش کرتے ہوئے کہا کہ یہ پیش رفت پاکستان کی سفارتی برتری کا ثبوت ہے جبکہ بھارت اس صورتحال پر شدید ردعمل کا شکار ہے۔
انہوں نے مزید کہا کہ پاکستان دنیا کی واحد اسلامی ایٹمی طاقت ہے اور حالیہ کامیابیاں ملک کے مثبت عالمی تشخص کو مزید مضبوط بنا رہی ہیں۔ ان کا کہنا تھا کہ عالمی سطح پر پاکستان کا کردار ایک ذمہ دار اور امن پسند ریاست کے طور پر ابھر رہا ہے، جبکہ بھارت سفارتی میدان میں پیچھے جا رہا ہے۔
پریس کانفرنس کے دوران انہوں نے اندرونِ ملک مختلف فلاحی منصوبوں پر بھی روشنی ڈالی۔ انہوں نے بتایا کہ بینظیر انکم سپورٹ پروگرام کے ذریعے حاصل ہونے والے ڈیٹا کی بنیاد پر بڑے پیمانے پر ہاؤسنگ منصوبہ شروع کیا جا رہا ہے، جس کے تحت تقریباً اکیس لاکھ خاندانوں کو گھر فراہم کیے جائیں گے۔ اس کے علاوہ سندھ حکومت نے “بینظیر ہاری کارڈ” بھی متعارف کرایا ہے تاکہ کاشتکاروں کو براہ راست سہولت فراہم کی جا سکے۔
زرعی شعبے کے حوالے سے انہوں نے کہا کہ گندم کی پیداوار میں اضافے کے لیے حکومت نے کاشتکاروں کو ڈی اے پی اور یوریا کھاد فراہم کی، جس کے نتیجے میں اس سال گندم کی فصل کو بمپر کراپ قرار دیا گیا ہے۔ انہوں نے بتایا کہ تین لاکھ سے زائد چھوٹے کاشتکاروں کو فی ایکڑ 1500 روپے فراہم کیے گئے ہیں، جو کہ ایک منفرد اقدام ہے۔
ٹرانسپورٹ کے شعبے میں بھی حکومت سندھ نے متعدد اقدامات کیے ہیں۔ انہوں نے کہا کہ عوام کو ریلیف دینے کے لیے انٹر سٹی اور انٹرا سٹی ٹرانسپورٹ پر سبسڈی دی جا رہی ہے تاکہ کرایوں میں اضافہ نہ ہو۔ اس کے ساتھ ساتھ “پنک اسکوٹیز” منصوبہ بھی شروع کیا گیا ہے جس کے تحت خواتین کو اسکوٹیز اور تربیت فراہم کی جا رہی ہے، اور یہ پروگرام کراچی کے بعد دیگر شہروں تک پھیلایا جا رہا ہے۔
صحت کے شعبے میں گفتگو کرتے ہوئے انہوں نے پولیو جیسے خطرناک مرض کے خلاف آگاہی کی اہمیت پر زور دیا۔ انہوں نے عوام سے اپیل کی کہ وہ ویکسینیشن مہم میں بھرپور حصہ لیں تاکہ ہر بچے کو اس بیماری سے محفوظ بنایا جا سکے۔
آخر میں انہوں نے کہا کہ حکومت پاکستان عالمی حالات کو مدنظر رکھتے ہوئے معاشی فیصلے کر رہی ہے، خصوصاً تیل کی قیمتوں کے حوالے سے، کیونکہ ملک درآمدی تیل پر انحصار کرتا ہے۔ انہوں نے واضح کیا کہ کسی بھی صورت میں ٹرانسپورٹ کے کرایوں میں بلاجواز اضافہ نہیں ہونے دیا جائے گا اور متعلقہ حکام کو اس سلسلے میں سخت ہدایات جاری کر دی گئی ہیں۔