وزیراعظم کا معذور افراد کے حقوق کے تحفظ کے عزم کا اعادہ

لاہور: وزیراعظم محمد شہباز شریف نے عالمی یومِ بریل کے موقع پر پاکستان اور دنیا بھر میں بصارت سے محروم افراد کے لیے نیک تمناؤں اور خیرسگالی کے جذبات کا اظہار کیا ہے۔

اپنے پیغام میں وزیراعظم نے کہا کہ لوئس بریل کا متعارف کردہ لمس پر مبنی تحریری نظام بصارت سے محروم افراد کے لیے تعلیم، معلومات تک رسائی اور باوقار زندگی کے بے شمار مواقع فراہم کرنے کا باعث بنا۔ انہوں نے کہا کہ اسی اہمیت کے پیش نظر اقوامِ متحدہ کی جنرل اسمبلی نے 2018 میں 4 جنوری کو عالمی یومِ بریل قرار دیا۔

وزیراعظم نے کہا کہ پاکستان میں بصارت سے محروم افراد نے مختلف شعبوں میں نمایاں خدمات انجام دی ہیں اور بریل کو اپناتے ہوئے یہ ثابت کیا ہے کہ صلاحیت اور محنت ہر رکاوٹ پر قابو پا سکتی ہے۔ انہوں نے واضح کیا کہ حکومتِ پاکستان بصارت سے محروم افراد سمیت تمام معذور افراد کے حقوق کے تحفظ، مساوی مواقع کی فراہمی اور ایک جامع و منصفانہ معاشرے کی تشکیل کے لیے پرعزم ہے۔

محمد شہباز شریف نے کہا کہ بصارت سے محروم افراد پاکستان میں مختلف شعبوں میں نہایت لگن اور دیانتداری سے خدمات انجام دے رہے ہیں، جن میں مسابقتی امتحانات اور سرکاری ادارے بھی شامل ہیں۔ انہوں نے وزارتِ خارجہ میں خدمات انجام دینے والی سائما سلیم کی مثال دیتے ہوئے کہا کہ یہ کامیابیاں عزم، قابلیت اور قومی فخر کی روشن علامت ہیں۔

وزیراعظم نے کہا کہ پاکستان اقوامِ متحدہ کے معذور افراد کے حقوق سے متعلق کنونشن کا رکن ہے اور 2023 میں مراکش معاہدے کی توثیق بھی کر چکا ہے، جس کے تحت بصارت سے محروم افراد کے لیے قابلِ رسائی اشاعتی مواد کی فراہمی یقینی بنائی جائے گی۔

انہوں نے تعلیمی اداروں، سول سوسائٹی، نجی شعبے اور میڈیا پر زور دیا کہ وہ حکومت کے ساتھ مل کر بریل خواندگی اور قابلِ رسائی سہولیات کے فروغ کے لیے مشترکہ کوششیں مزید مضبوط کریں۔ وزیراعظم نے کہا کہ بطور قوم ہمیں یہ عہد کرنا ہوگا کہ کوئی بھی شہری مواقع کے حصول میں پیچھے نہ رہ جائے اور ہر فرد ملک کی ترقی میں مؤثر کردار ادا کر سکے