دستاویزات کی تصدیق کے لیے وزارتِ خارجہ نئی موبائل ایپ متعارف کرانے جا رہی ہے

وزارتِ خارجہ (موفا) دستاویزات کی تصدیق کے عمل کو مزید آسان، شفاف اور جدید بنانے کے لیے ایک نئی موبائل ایپ متعارف کرانے جا رہی ہے جس کے ذریعے عمومی تصدیق سمیت مختلف خدمات میں انسانی رابطہ کم سے کم رکھا جائے گا اور درخواستوں کی ریئل ٹائم ٹریکنگ ممکن ہو سکے گی۔ ویلتھ پاکستان کو دستیاب ایک دستاویز کے مطابق یہ اقدام وزارتِ خارجہ کے نظام کو جدید خطوط پر استوار کرنے اور عوام کو تیز تر و مؤثر سہولیات فراہم کرنے کی جامع حکمتِ عملی کا حصہ ہے۔

دستاویز کے مطابق زیرِ تکمیل موبائل ایپ صارفین کو درخواستوں کی لمحہ بہ لمحہ نگرانی کی سہولت فراہم کرے گی جبکہ کم انسانی مداخلت کے باعث نہ صرف شفافیت بڑھے گی بلکہ وزارتِ خارجہ کے دفاتر کے غیر ضروری دوروں میں بھی نمایاں کمی آئے گی۔ اس اقدام سے عوام کے لیے دستاویزات کی تصدیق کا عمل زیادہ سہل اور صارف دوست بن جائے گا۔

وزارتِ خارجہ اس منصوبے کے تحت مختلف سرکاری اداروں اور ڈیٹا بیسز کو ایک مربوط نظام میں شامل کرنے پر بھی کام کر رہی ہے، جن میں ہائر ایجوکیشن کمیشن، انٹر بورڈ کمیٹی آف چیئرمین، نادرا اور صوبائی ڈیٹا بیسز شامل ہیں۔ اس انضمام کا مقصد تصدیقی عمل کو تیز، مؤثر اور قابلِ اعتماد بنانا ہے۔

دستاویز میں مزید بتایا گیا ہے کہ وزارتِ خارجہ اپنی عمارت میں ایک نیا قونصلر ہال تعمیر کرنے کا بھی منصوبہ رکھتی ہے تاکہ بڑھتی ہوئی عوامی ضروریات کو بہتر انداز میں پورا کیا جا سکے۔ اس کے ساتھ ساتھ معروف سروس پرووائیڈرز کے اشتراک سے مکمل ڈیجیٹلائزیشن کے لیے ون ونڈو حل پر بھی کام جاری ہے تاکہ تمام متعلقہ سہولیات ایک ہی پلیٹ فارم پر دستیاب ہوں۔

عمومی دستاویزات کی تصدیق کے عمل کو بھی اپوسٹائل تصدیق کے کامیاب ڈیجیٹل ماڈل کی طرز پر آن لائن اور جدید بنایا جائے گا، جس سے عوام کو گھر بیٹھے سہولیات حاصل ہو سکیں گی۔ مزید برآں، وزارتِ خارجہ کی خدمات کو وزیراعظم کے آسان خدمت مراکز کے ساتھ منسلک کیا جا رہا ہے تاکہ ملک بھر میں شہریوں کو مقامی سطح پر سہولت فراہم کی جا سکے۔

ویلتھ پاکستان سے گفتگو کرتے ہوئے سیکریٹری وزارتِ خارجہ آمنہ بلوچ نے کہا کہ اس ڈیجیٹل تبدیلی کا مقصد ایک مؤثر، شفاف اور عوام دوست وزارتِ خارجہ کی تشکیل ہے جہاں مستقبل میں سرکاری خدمات محض ایک بٹن دبانے پر دستیاب ہوں گی۔